عید الاضحی ہر مسلمان کو ایک اعلیٰ مقصد کی خاطر قربانی دینے کے لئے ہمہ وقت تیار رہنے کی یاد دہانی کراتی ہے: بلاول بھٹو زرداری

اسلام آباد : پاکستان پیپلز پارٹی کے چیئرمین بلاول بھٹو زرداری نے کہا ہے کہ آج منائی جانے والی عید الاضحی ہر مسلمان کو ایک اعلیٰ مقصد کی خاطر قربانی دینے کے لئے ہمہ وقت تیار رہنے کی یاد دہانی کراتی ہے۔ لہذا آج ہر مسلمان کو اپنی انا کو قربان کرنے کا عزم کرنا ہوگا اور اس کے ساتھ ساتھ ایک عظیم مقصد کے لیئے اتحاد اور اس پر عمل کے لیے اتحاد کے لیئے کام کرنا ہوگا۔

ان خیالات کا اظہار انہوں نے عیدالاضحیٰ کے موقعے پر جاری کردہ اپنے پیغام میں پوری دنیا میں آباد مسلمانوں کو اپنی جانب سے مبارکباد دیتے ہوئے کیا ہے۔ انہوں نے کہا ہے کہ میں دنیا بھر میں آباد مسلمانوں اور خاص طور پر پاکستان کے مسلمان شہریوں کو آج کے پرمسرت موقعے پر مبارکباد پیش کرتا ہوں۔

انہوں نے کہا کہ عیدالاضحیٰ کے اس پرمسرت موقعے پر میں ملک کے حکمرانوں پر زور دیتا ہوں کہ وہ اپنی پھولی ہوئی انا کو چھوڑ دیں اور عوام کو اس حقیقی مقصد و کاز کے لئے متحد کرنے کی کوشش کریں جو واقعی قومی ہو اور کسی کی بھی ذات سے بلند ہو۔ پی پی پی چیئرمین نے عوام پر زور دیا کہ وہ یہ عید نہایت سادگی کے ساتھ منائیں اور اس دوران معاشرتی دوری اور مہلک وباء کے دوران احتیاطی تدابیر پر عمل کریں۔

میں عوام کو بھی اپیل کرتا ہوں کہ وہ اپنے کم خوشنصیب بھائیوں کو بھی عید کی خوشیوں میں یاد رکھیں جو غربت کے باعث زندگی کی بنیادی ضروریات سے محروم ہیں، اور ان کے ساتھ سخاوت سے پیش آئیں۔ انہوں نے کہا کہ اسلام ہمیں درس دیتا ہے کہ دوسروں کے ساتھ سخاوت سے پیش آنے والوں کو اللہ تعالیٰ اپنے فضل و کرم سے دگنا عطا کرتا ہے۔

اسلام کا پیغام معاشرتی انصاف کا پیغام ہے اور اپنی برادری کے حوالے سے ہم پر ایک ذمہ داری عائد ہوتی ہے، جس کے ذریعے ہم زندگی میں ایک اعلی مقصد حاصل کر سکتے ہیں۔

اپنا تبصرہ بھیجیں